ഗീതം ഗീതം ജയ

ഗീതം ഗീതം ജയ ജയ ഗീതം
പാടുവിന്‍ സോദരരെ - നമ്മള്‍
യേശുനാഥന്‍ ജീവിക്കുന്നതിനാല്‍
ജയഗീതം പാടിടുവിന്‍ (ഗീതം..)

പാപം ശാപം സകലവും തീര്‍പ്പാന്‍
അവതരിച്ചിഹെ നരനായ്‌ - ദൈവ
കോപത്തീയില്‍ വെന്തെരിഞ്ഞവനാം
രക്ഷകന്‍ ജീവിക്കുന്നു (ഗീതം..)

ഉലകമാഹാന്മാരഖിലരുമൊരുപോല്‍
ഉറങ്ങുന്നു കല്ലറയില്‍ - നമ്മള്‍
ഉന്നതന്‍ യേശു മഹേശ്വരന്‍ മാത്രം
ഉയരത്തില്‍ വാണിടുന്നു (ഗീതം..)

കലുഷതയകറ്റി കണ്ണുനീര്‍ തുടപ്പീന്‍
ഉല്‍സുകരായിരിപ്പിന്‍ - നമ്മള്‍
ആത്മനാഥന്‍ ജീവിക്കവെ ഇനി
അലസത ശരിയാമോ? (ഗീതം..)

വാതിലുകളെ! നിങ്ങള്‍ തലകളെ ഉയര്‍ത്തീന്‍
വരുന്നിതാ ജയരാജന്‍ - നിങ്ങള്‍
ഉയര്‍ന്നിരിപ്പീന്‍ കതകുകളെ ശ്രീ-
യേശുവെ സ്വീകരിപ്പാന്‍ (ഗീതം..)