യേശുമഹേശനെന്‍

യേശുമഹേശനെന്‍ പ്രാണനാഥന്‍ ക്രൂശില്‍
തൂങ്ങിമരിച്ചോനെന്‍ സങ്കേതമേ

സാഗരത്തില്‍ തിരമാലപോലെ പല
കാര്യങ്ങളാല്‍ മനതാരിന്നയ്യോ!
പാരം ദുഃഖം കൊണ്ടു നിറഞ്ഞീടുകിലും
നാകേശ്വരന്‍ എന്റെ സങ്കേതമേ.

മുള്ളുകള്‍ക്കുള്ളില്‍ വളര്‍ന്നീടും താമര
പോലെ ഞാന്‍മേവുന്നു മേദിനിയില്‍
ഉള്ളം നുറുങ്ങുന്നു മുള്ളിന്‍മുന കൊണ്ട്
എല്ലാ ദളങ്ങളും കീറിടുന്നു.

സ്നേഹത്തിന്‍ വല്ലഭാ, നല്ല നാരകമേ
നിന്റെ നിഴല്‍ക്കീഴെന്താശ്വാസമേ
തേന്‍തുളുമ്പും പഴമെല്ലായ്പോഴുംഭുജി-
ച്ചുല്ലാസത്തോടെ ഞാന്‍ വാണീടുമേ

വാരുറ്റ കാന്തി കലര്‍ന്നുള്ളനിന്‍മുഖ-
ത്തെങ്ങും വടുക്കള്‍ ഞാന്‍ കണ്ടീടുന്നു
മുള്ളുകൊണ്ടിറ്റു വീണുള്ളനിണമങ്ങു
കാണുമ്പോളാശ്വാസം തിങ്ങിടുന്നു.

പട്ടിണിവന്നാലും നഷ്ടങ്ങള്‍ വന്നാലും
വീട്ടുകാരും പുനര്‍ നാട്ടുകാരും
വിട്ടുവെന്നാകിലും സന്തോഷത്തോടെന്റെ
കര്‍ത്താവിന്‍ മാര്‍വില്‍ ഞാന്‍ പാര്‍ത്തീടുമേ

കര്‍ത്താവിനെ പ്രതി എന്തും സഹിക്കുവാന്‍
ശക്തി തരുന്നു ഹാ! ആശ്വാസമേ
രക്തം നിറഞ്ഞുള്ള കൈകൊണ്ടു താങ്ങുന്നു
അപ്പവും വെള്ളവും തന്നീടുന്നു