ഞാന്‍ എങ്ങിനെ മറക്കും

ഞാന്‍ എങ്ങിനെ മറക്കും
എന്നെ ഓര്‍ക്കുന്നോനെ?
ഞാന്‍ എങ്ങിനെ വിലക്കും
എന്‍ ആത്മ വൈദ്യനെ?
ഞാന്‍ രോഗിയായ്ക്കിടന്നു
നീ ശാന്തി തന്നവന്‍,
കാരുണ്യ സൌഖ്യം വന്നു,
നിന്നാല്‍, എന്‍ രക്ഷകന്‍.

ഈ സ്നേഹത്തെ ഞാന്‍ ഓര്‍ത്തു
എന്‍ സ്നേഹം വിടാമോ?
കനിഞ്ഞു കണ്ണീര്‍ തോര്‍ത്തു
തന്നോനെ തള്ളാമോ?
എന്‍ ലജ്ജ നീ ചുമന്നു
ക്രൂശില്‍ തറച്ചവന്‍;
പിന്നാലെ ഞാനും വന്നു
അയോഗ്യ സേവകന്‍

നിന്‍ സേവയില്‍ എന്‍ ദേഹം
വച്ചേയ്ക്കാം നാഥനേ,
നിന്നില്‍ വാടാത്ത സ്നേഹം
കാട്ടേണം യേശുവേ;
മരണം വന്നാല്‍ പിന്നെ
നീ മാത്രം എന്‍ ധനം;
സന്തോഷപൂര്‍ണ്ണം അന്നേ
വിശ്വാസം സല്‍ഫലം.