വരുവിന്‍ യേശുവിന്‍ അരികില്‍

വരുവിന്‍ യേശുവിന്‍ അരികില്‍
എത്ര നല്ലവന്‍ താന്‍ രുചിച്ചറികില്‍ (2)
വരുവിന്‍ കൃപകള്‍
പൊഴിയും കുരിശിന്നരികില്‍ (2) (വരുവിന്‍..)

കൃപമേല്‍ കൃപയാര്‍ന്നിടുവാന്‍
നമ്മള്‍ പരമപാദം ചേര്‍ന്നിടുവാന്‍
ധരയില്‍ നടന്ന തന്‍ ചരണം
നിങ്ങള്‍ക്കരുളും ശാശ്വത ശരണം
അല്ലും പകലും മുന്‍പില്‍
നില്‍പവന്‍ തുണയായ്‌ (2) (വരുവിന്‍..)

പരിശോധനകള്‍ വരികില്‍
മനം പതറാതാശ്രയിച്ചിടുകില്‍
ബലഹീനതയില്‍ കവിയും
കൃപ മതിയെന്നാശ്രയിച്ചിടുകില്‍
വിരവില്‍ വിനകള്‍
തീരും സകലവും ശുഭമായ് (2) (വരുവിന്‍..)

സ്നേഹിതരേവരും വെടിഞ്ഞാല്‍
അത് യേശുവിനോടു നീ പറഞ്ഞാല്‍
സ്നേഹിതരില്ലാക്കുരിശില്‍-
പെട്ട പാടുകളെഴും തന്‍ കരത്താല്‍
നന്നായ്‌ നടത്തും
വീട്ടില്‍ ചേരും വരെയും (2) (വരുവിന്‍..)

ഒരുനാള്‍ നശ്വര ലോകം
വിട്ടു പിരിയും നാമതിവേഗം
അങ്ങേക്കരയില്‍ നിന്നും
നാം നേടിയതെന്തെന്നറിയും
ലോകം വെറുത്തോര്‍
വില നാം അന്നാളറിയും (2) (വരുവിന്‍..)