പൊന്നേശു തമ്പുരാന്‍

പൊന്നേശു തമ്പുരാന്‍ നല്ലൊരു രക്ഷകന്‍
എന്നെ സ്നേഹിച്ചു തന്‍ ജീവന്‍ വച്ചു

സ്വര്‍ഗ്ഗസിംഹാസനം താതന്റെ മാര്‍വ്വതും
ദൂതന്മാര്‍ സേവയും വിട്ടെന്‍പേര്‍ക്കായ്
ദാസനെപ്പോലവന്‍ ജീവിച്ചു പാപിയെന്‍
ശാപം ശിരസ്സതില്‍ ഏറ്റീടുവാന്‍

തള്ളയെപ്പോല്‍ നമുക്കുള്ളൊരു രക്ഷകന്‍
കൊള്ളക്കാരന്‍ പോലെ ക്രൂശില്‍ തൂങ്ങി;
ഉള്ളമുരുകുന്നെന്‍ ചങ്കു തകരുന്നെന്‍
കണ്ണു നിറയുന്നെന്‍ രക്ഷകനേ

എന്തൊരു സ്നേഹമീ സാധുവെ ഓര്‍ത്തു നീ
സന്താപ സാഗരം തന്നില്‍ വീണു;
എന്നെ വിളിച്ചു നീ; എന്നെ എടുത്തു നി-
ന്നോമനപ്പൈതലായ്‌ തീര്‍ക്കേണമേ

പാപം ചെയ്യാതെന്നെ കാവല്‍ ചെയ്തീടുവാന്‍
സര്‍വ്വേശനേ കയ്യിലേല്‍പ്പിക്കുന്നു
രാപ്പകല്‍ നീയെന്നെ വീഴ്ചയില്‍ നിന്നെന്റെ
സ്വപ്നത്തിലും കൂടെ കാക്കേണമേ

കര്‍ത്താവു വേഗത്തില്‍ മേഘങ്ങളില്‍ കോടി-
ദൂതന്മാരാര്‍പ്പുമായ്‌ വന്നീടുമ്പോള്‍
എന്നില്‍ കനിഞ്ഞെന്റെ മാര്‍വ്വോടണച്ചെന്റെ
സങ്കടം തീര്‍ക്കണം രക്ഷകനേ